“ಶರತ್ ಅವರ ಜನ್ಮದಿನಕ್ಕೆ, ಈ ಟ್ರೋಫಿಯೇ ನಮ್ಮ ಉಡುಗೊರೆ”: ಆರ್ ಎಕ್ಸ್ ಸಲಗ ಆಟಗಾರ ಅನಿಲ್ ಖಾರ್ವಿ ಭಾವುಕ ನುಡಿ
ಉಡುಪಿ: ಎಸ್ ಕೆ ಸ್ಪೋರ್ಟ್ಸ್ ಪಾಂಗಳ ಆಶ್ರಯದಲ್ಲಿ ನಡೆದ ಎಸ್ ಕೆ ಸ್ಪೋರ್ಟ್ಸ್ ಟ್ರೋಫಿ–2026 ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಆರ್ ಎಕ್ಸ್ ಸಲಗ ಕುಂದಾಪುರ ತಂಡ ಪ್ರಥಮ ಬಹುಮಾನ ಹಾಗೂ ಶಾಶ್ವತ ಫಲಕವನ್ನು ತನ್ನದಾಗಿಸಿಕೊಳ್ಳುವ ಮೂಲಕ ಭರ್ಜರಿ ಸಾಧನೆ ಮಾಡಿದೆ.
ಈ ಗೆಲುವು ಕೇವಲ ಕ್ರೀಡಾ ವಿಜಯವಾಗಿ ಉಳಿಯದೆ, ತಂಡದ ಸ್ಥಾಪಕರಾಗಿದ್ದ ದಿವಂಗತ ಶರತ್ ಖಾರ್ವಿ ಅವರ ಸ್ಮರಣೆಗೆ ಸಲ್ಲಿಸಿದ ಭಾವಪೂರ್ಣ ನಮನವಾಗಿ ಪರಿಣಮಿಸಿದೆ.
ವಿಜಯದ ಬಳಿಕ ಮಾತನಾಡಿದ ತಂಡದ ಆಟಗಾರ ಅನಿಲ್ ಖಾರ್ವಿ, “ಈ ಟ್ರೋಫಿ ನಮ್ಮ ತಂಡಕ್ಕೆ ಸಿಕ್ಕಿರುವ ಪ್ರಶಸ್ತಿಯಷ್ಟೇ ಅಲ್ಲ; ಇದು ನಮ್ಮನ್ನು ಅಗಲಿದ ಶರತ್ ಖಾರ್ವಿ ಅವರಿಗೆ ನೀಡುತ್ತಿರುವ ಹುಟ್ಟುಹಬ್ಬದ ಉಡುಗೊರೆ. ನಾಳೆ ಅವರ ಜನ್ಮದಿನ. ಅವರು ನಮ್ಮನ್ನಗಲಿ ಒಂದು ವರ್ಷ ತುಂಬುತ್ತಿದೆ. ಅವರ ಕನಸು, ಪ್ರೋತ್ಸಾಹ ಮತ್ತು ಮಾರ್ಗದರ್ಶನವೇ ಇಂದು ನಮ್ಮನ್ನು ಈ ಹಂತಕ್ಕೆ ತಂದಿದೆ. ಈ ಗೆಲುವನ್ನು ಅವರಿಗೆ ಸಮರ್ಪಿಸುತ್ತೇವೆ” ಎಂದು ಭಾವುಕರಾಗಿ ಹೇಳಿದರು.
ಕ್ರಿಕೆಟ್ ಮೇಲಿನ ಅಪಾರ ಪ್ರೀತಿ, ಯುವ ಆಟಗಾರರ ಮೇಲಿನ ಕಾಳಜಿ ಹಾಗೂ ಕ್ರೀಡಾಭಿವೃದ್ಧಿಯ ಕನಸನ್ನು ಹೊಂದಿದ್ದ ಶರತ್ ಖಾರ್ವಿ ಅವರು ಆರ್ ಎಕ್ಸ್ ಸಲಗ ತಂಡದ ಸ್ಥಾಪಕರಾಗಿದ್ದರು. ಯುವ ಪ್ರತಿಭೆಗಳನ್ನು ಗುರುತಿಸಿ ಬೆಳೆಸುವಲ್ಲಿ ಸದಾ ಮುಂಚೂಣಿಯಲ್ಲಿದ್ದ ಅವರು ತಂಡದ ಸದಸ್ಯರಿಗೆ ಮಾರ್ಗದರ್ಶಕರಾಗಿ, ಸ್ನೇಹಿತರಾಗಿ ಹಾಗೂ ಪ್ರೇರಣಾ ಶಕ್ತಿಯಾಗಿ ನಿಂತಿದ್ದರು.
ವಿಧಿಯಾಟವೆಂಬಂತೆ ಕಳೆದ ವರ್ಷ ತಮ್ಮ ಜನ್ಮದಿನದ ಮರುದಿನವೇ ಹೃದಯಾಘಾತದಿಂದ ಅವರು ನಿಧನರಾಗಿದ್ದು, ಕ್ರೀಡಾ ವಲಯವನ್ನು ದುಃಖದ ಸಾಗರದಲ್ಲಿ ಮುಳುಗಿಸಿತ್ತು. ಅವರ ಅಗಲಿಕೆಯ ನೋವು ಇಂದಿಗೂ ತಂಡದ ಸದಸ್ಯರನ್ನು ಕಾಡುತ್ತಿದ್ದರೂ, ಅವರ ಕನಸುಗಳನ್ನು ನನಸಾಗಿಸುವ ದೃಢ ಸಂಕಲ್ಪದೊಂದಿಗೆ ತಂಡ ಮುನ್ನಡೆಯುತ್ತಿದೆ.
ಈ ಬಾರಿಯ ಚಾಂಪಿಯನ್ ಪಟ್ಟವನ್ನು ಶರತ್ ಖಾರ್ವಿ ಅವರಿಗೆ ಅರ್ಪಿಸಿರುವ ಆರ್ ಎಕ್ಸ್ ಸಲಗ ತಂಡ, ಅವರ ಕ್ರೀಡಾಪ್ರೇಮ, ಸೇವಾ ಮನೋಭಾವ ಮತ್ತು ಯುವಕರ ಮೇಲಿನ ವಿಶ್ವಾಸವನ್ನು ಮುಂದಿನ ಪೀಳಿಗೆಗೂ ತಲುಪಿಸುವ ಪ್ರತಿಜ್ಞೆ ಮಾಡಿದೆ. ಈ ಗೆಲುವು ಕೇವಲ ಟ್ರೋಫಿಯ ವಿಜಯವಲ್ಲ; ಅದು ಶರತ್ ಖಾರ್ವಿ ಅವರ ನೆನಪು, ಕನಸು ಹಾಗೂ ಕ್ರೀಡಾಸ್ಫೂರ್ತಿಗೆ ಸಲ್ಲಿಸಿದ ಗೌರವಪೂರ್ಣ ನಮನವಾಗಿದೆ.
