ಮುಂಬೈ: ಬಾಲಿವುಡ್ ನಟಿ ರಾಣಿ ಮುಖರ್ಜಿ ಅವರಿಗೆ ಬುಧವಾರ ನಡೆದ 62ನೇ ಮಹಾರಾಷ್ಟ್ರ ರಾಜ್ಯ ಚಲನಚಿತ್ರ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಪ್ರತಿಷ್ಠಿತ ‘ರಾಜ್ ಕಪೂರ್ ವಿಶೇಷ ಕೊಡುಗೆ ಪ್ರಶಸ್ತಿ’ ನೀಡಿ ಗೌರವಿಸಲಾಯಿತು.
ಮಹಾರಾಷ್ಟ್ರದ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಅವರಿಂದ ಪ್ರಶಸ್ತಿ ಸ್ವೀಕರಿಸಿದ ರಾಣಿ ಮುಖರ್ಜಿ, ಸಾಂಸ್ಕೃತಿಕ ವ್ಯವಹಾರಗಳ ಸಚಿವ ಅಡ್ವೊಕೇಟ್ ಆಶಿಶ್ ಶೆಲಾರ್ ಅವರ ಉಪಸ್ಥಿತಿಯಲ್ಲಿ ಮಾತನಾಡಿದರು. ಸಿನಿಮಾ ತಮ್ಮ ಪಾಲಿಗೆ ಆಳವಾದ ಭಾವನೆಯಾಗಿದ್ದು, ಆ ಭಾವನೆಯ ತವರು ಮಹಾರಾಷ್ಟ್ರ ಎಂದು ಅವರು ಹೇಳಿದರು.
ಮರಾಠಿಯಲ್ಲಿ ಮಾತನಾಡಿದ ರಾಣಿ, “ನನ್ನ ಪಾಲಿಗೆ ಮಹಾರಾಷ್ಟ್ರ ಕೇವಲ ಒಂದು ರಾಜ್ಯವಲ್ಲ. ಮಹಾರಾಷ್ಟ್ರ ನನ್ನ ಜನ್ಮಭೂಮಿ. ನನ್ನ ಕರ್ಮಭೂಮಿ. ನನ್ನ ಜೀವನದ ಅವಿಭಾಜ್ಯ ಅಂಗ” ಎಂದು ಹೇಳಿದರು.
ಮುಂಬೈನೊಂದಿಗಿನ ತಮ್ಮ ಆಳವಾದ ನಂಟನ್ನು ಸ್ಮರಿಸಿದ ‘ಮರ್ದಾನಿ’ ನಟಿ, “ಮುಂಬೈ ನನಗೆ ನನ್ನ ಗುರುತನ್ನು ನೀಡಿದೆ. ಪ್ರೇಕ್ಷಕರನ್ನು ನೀಡಿದೆ. ವೃತ್ತಿಜೀವನವನ್ನು ನೀಡಿದೆ. ಅದು ನನ್ನ ಮನೆ, ನನ್ನ ಸುರಕ್ಷಿತ ತಾಣ, ನನ್ನ ಎಲ್ಲವೂ ಆಗಿದೆ. ಆದ್ದರಿಂದ ಈ ಪ್ರಶಸ್ತಿ ನನ್ನ ಹೃದಯದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿರುತ್ತದೆ. ನಾನು ಈ ಪ್ರಶಸ್ತಿಯನ್ನು ನೋಡಿದಾಗಲೆಲ್ಲ ಕೇವಲ ಪ್ರಶಸ್ತಿಯನ್ನು ನೋಡುವುದಿಲ್ಲ; ನನ್ನ ಮುಂಬೈ ಮತ್ತು ನನ್ನ ಮಹಾರಾಷ್ಟ್ರವನ್ನು ಕಾಣುತ್ತೇನೆ” ಎಂದು ಭಾವುಕರಾಗಿ ಹೇಳಿದರು.
ಶಕ್ತಿಶಾಲಿ ಮಹಿಳಾ ಪಾತ್ರಗಳು ಹಾಗೂ ಮಹಿಳಾ ಕೇಂದ್ರಿತ ಕಥೆಗಳಿಗೆ ಹೆಸರುವಾಸಿಯಾಗಿರುವ ರಾಣಿ ಮುಖರ್ಜಿ, ಸಿನಿಮಾದ ಕುರಿತ ತಮ್ಮ ದೃಷ್ಟಿಕೋನವನ್ನು ಹಂಚಿಕೊಂಡರು.
“ಸರಿಯಾದ ಮನಸ್ಸು ಮತ್ತು ಹೃದಯ ಹೊಂದಿರುವ ಸಿನಿಮಾಗಳ ಮೂಲಕ ಭಾರತದ ಶಕ್ತಿಶಾಲಿ ಹೆಣ್ಣುಮಕ್ಕಳು ಹಾಗೂ ಮಹಿಳೆಯರನ್ನು ಪ್ರತಿನಿಧಿಸಲು ನಾನು ಸದಾ ಮೌನವಾಗಿ ಕೆಲಸ ಮಾಡಿದ್ದೇನೆ” ಎಂದು ಅವರು ಹೇಳಿದರು.
“ನನಗೆ ಸತ್ಯವೆನಿಸಿದ ಪಾತ್ರಗಳನ್ನು ನಾನು ಆಯ್ಕೆ ಮಾಡಿಕೊಂಡಿದ್ದೇನೆ. ಅವುಗಳ ಕಥೆ, ಪಯಣ ಮತ್ತು ಸವಾಲುಗಳನ್ನು ಎದುರಿಸುವ ಸಾಮರ್ಥ್ಯ ನನ್ನನ್ನು ಸಹಜವಾಗಿಯೇ ಆಕರ್ಷಿಸಿವೆ. ಧೈರ್ಯ ಹೊಂದಿರುವ ಪಾತ್ರಗಳು, ತಮ್ಮದೇ ಆದ ನ್ಯೂನತೆಗಳನ್ನು ಹೊಂದಿರುವ ಪಾತ್ರಗಳು, ಹಿನ್ನೆಲೆಗೆ ಸರಿದು ಮರೆಯಾಗಲು ನಿರಾಕರಿಸುವ ಪಾತ್ರಗಳನ್ನು ನಾನು ಆಯ್ಕೆ ಮಾಡಿಕೊಂಡಿದ್ದೇನೆ. ಬೇರೆಯವರು ಬಂದು ತಮ್ಮನ್ನು ರಕ್ಷಿಸಲಿ ಎಂದು ಕಾಯದ ಮಹಿಳೆಯರ ಪಾತ್ರಗಳಿಗೆ ನಾನು ಆದ್ಯತೆ ನೀಡಿದ್ದೇನೆ” ಎಂದು ರಾಣಿ ಹೇಳಿದರು.
“ನಾನು ಎಂದಿಗೂ ಸಿನಿಮಾವನ್ನು ಕೇವಲ ವೃತ್ತಿಯಾಗಿ ಪರಿಗಣಿಸಿಲ್ಲ. ನನ್ನ ಪಾಲಿಗೆ ಸಿನಿಮಾ ಒಂದು ಆಳವಾದ ಭಾವನೆ. ಮತ್ತು ಆ ಭಾವನೆಯ ತವರು ಮಹಾರಾಷ್ಟ್ರ” ಎಂದು ರಾಣಿ ಮುಖರ್ಜಿ ತಮ್ಮ ಮಾತುಗಳನ್ನು ಮುಕ್ತಾಯಗೊಳಿಸಿದರು.
