ಬೈಂದೂರು: ನಕಲಿ ವಾಹನ ದಾಖಲೆಗಳು, ವಿಮಾ ಪಾಲಿಸಿಗಳು ಹಾಗೂ ಇತರ ದಾಖಲೆಗಳನ್ನು ಸೃಷ್ಟಿಸಿ ಬೈಂದೂರು ಯಡ್ತರೆಯ ಎಂಸಿಸಿ ಬ್ಯಾಂಕ್ ಶಾಖೆಯಿಂದ ವಾಹನ ಸಾಲ ಮತ್ತು ಆಸ್ತಿ ಅಡಮಾನ ಸಾಲ ಪಡೆದು ವಂಚಿಸಿರುವ ಆರೋಪಕ್ಕೆ ಸಂಬಂಧಿಸಿದಂತೆ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಮೂರು ಪ್ರತ್ಯೇಕ ಪ್ರಕರಣಗಳು ದಾಖಲಾಗಿವೆ.
ಎಂಸಿಸಿ ಬ್ಯಾಂಕ್‌ನ ಉಡುಪಿ ವಿಭಾಗದ ಮುಖ್ಯ ವ್ಯವಸ್ಥಾಪಕ ಹಾಗೂ ವಸೂಲಾತಿ ಅಧಿಕಾರಿ ಸಂದೀಪ್ ಕ್ವಾಡ್ರಸ್ ಅವರು ನೀಡಿದ ದೂರಿನ ಪ್ರಕಾರ, 2026ರ ಜುಲೈ 11ರಂದು ಶಿರೂರು ಜೂಹಾ ಮಂಜಿಲ್ ನಿವಾಸಿ ಸಮೀರನ್ ಶೇಖ್ ಹಾಗೂ ಅವರ ಜಾಮೀನುದಾರ ಅಸ್ನಾ ಶೇಖ್ ಅವರು ಹೊಸ ಟೊಯೋಟಾ ಇನ್ನೋವಾ ಕ್ರಿಸ್ಟಾ ಕಾರು ಖರೀದಿಸುವುದಾಗಿ ತಿಳಿಸಿ, ನಂದಿ ಟೊಯೋಟಾ ಕಾರ್ಸ್ ಪ್ರೈವೇಟ್ ಲಿಮಿಟೆಡ್‌ನ ಕೊಟೇಶನ್ ಸಲ್ಲಿಸಿ 2.75 ಲಕ್ಷ ರೂ. ಸಾಲ ಪಡೆದಿದ್ದರು. ಬಳಿಕ KA-20-ZZ-9876 ನೋಂದಣಿ ಸಂಖ್ಯೆಯ ವಾಹನವನ್ನು ಪರಿಶೀಲನೆಗೆ ಹಾಜರುಪಡಿಸಿ, ಆರ್‌ಸಿ, ಖರೀದಿ ಬಿಲ್, ವಿಮೆ ಹಾಗೂ ಬಿ-ಎಕ್ಸ್‌ಟ್ರ್ಯಾಕ್ಟ್ ದಾಖಲೆಗಳನ್ನು ಸಲ್ಲಿಸಿದ್ದರು. ಎರಡು ತಿಂಗಳ ಕಂತುಗಳನ್ನೂ ಪಾವತಿಸಿದ್ದರು. ಆದರೆ ಬ್ಯಾಂಕ್ ಅಧಿಕಾರಿಗಳು ದಾಖಲೆಗಳ ನೈಜತೆಯನ್ನು ಪರಿಶೀಲಿಸಿದಾಗ ಸಲ್ಲಿಸಿದ್ದ ದಾಖಲೆಗಳೆಲ್ಲವೂ ನಕಲಿ ಎಂಬುದು ಪತ್ತೆಯಾಗಿದೆ.
ಇದೇ ರೀತಿ, 2026ರ ಸೆಪ್ಟೆಂಬರ್ 22ರಂದು ಗಂಗೊಳ್ಳಿಯ ಖಾರ್ವಿಕೇರಿ ನಿವಾಸಿ ಮಹಮದ್ ಹುಸೈನ್ ಅಜುಮುದ್ದೀನ್ ಹಾಗೂ ಅವರ ಜಾಮೀನುದಾರ ತೆಕ್ಕಟ್ಟೆಯ ಜನತಾ ಕಾಲೋನಿ ಅಲೂಗುಡ್ಡೆ ನಿವಾಸಿ ಸಾನಾಬಿ ಅವರು ಹೊಸ ಟೊಯೋಟಾ ಫಾರ್ಚುನರ್ ಕಾರು ಖರೀದಿಸುವುದಾಗಿ ತಿಳಿಸಿ, ನಂದಿ ಟೊಯೋಟಾ ಕಾರ್ಸ್ ಪ್ರೈವೇಟ್ ಲಿಮಿಟೆಡ್‌ನ ಕೊಟೇಶನ್ ಸಲ್ಲಿಸಿ ಸೆಪ್ಟೆಂಬರ್ 28ರಂದು ಬ್ಯಾಂಕ್‌ನಿಂದ 33.49 ಲಕ್ಷ ರೂ. ಸಾಲ ಪಡೆದಿದ್ದರು. ಬಳಿಕ KA-04-MH-4174 ನೋಂದಣಿ ಸಂಖ್ಯೆಯ ವಾಹನದ ವಿಮಾ ಪಾಲಿಸಿಯನ್ನು ಸಲ್ಲಿಸಿ ಒಂದು ಕಂತಿನ ಸಾಲವನ್ನೂ ಮರುಪಾವತಿಸಿದ್ದರು. ಬ್ಯಾಂಕ್ ಅಧಿಕಾರಿಗಳು ಆರ್‌ಟಿಒ ಕಚೇರಿಯ ಮೂಲಕ ದಾಖಲೆಗಳನ್ನು ಪರಿಶೀಲಿಸಿದಾಗ ವಿಮಾ ಪಾಲಿಸಿಯಲ್ಲಿ ನಮೂದಿಸಿದ್ದ ವಾಹನದ ನೋಂದಣಿ ಸಂಖ್ಯೆ ನಕಲಿ ಎಂಬುದು ಬೆಳಕಿಗೆ ಬಂದಿದೆ.
ಮೂರನೇ ಪ್ರಕರಣದಲ್ಲಿ, 2026ರ ಜುಲೈ 15ರಂದು ಸಿದ್ದಾಪುರ ಗ್ರಾಮದ ಹೊಸಂಗಡಿ ನಿವಾಸಿ ಮಹಮದ್ ಸಲೀಂ ಹಾಗೂ ಅವರ ಜಾಮೀನುದಾರ ಸಿದ್ದಾಪುರದ ಹೆಣ್ಣೆಬೈಲು ನಿವಾಸಿ ಅಲ್ ಶಕೀರಾ ಅವರು ಹೊಸ ಟೊಯೋಟಾ ಇನ್ನೋವಾ ಕ್ರಿಸ್ಟಾ ಕಾರು ಖರೀದಿಸುವುದಾಗಿ ತಿಳಿಸಿ, ನಂದಿ ಟೊಯೋಟಾ ಕಾರ್ಸ್ ಪ್ರೈವೇಟ್ ಲಿಮಿಟೆಡ್‌ನ ಕೊಟೇಶನ್ ಸಲ್ಲಿಸಿ ಬ್ಯಾಂಕ್‌ನಿಂದ 26 ಲಕ್ಷ ರೂ. ಸಾಲ ಪಡೆದಿದ್ದರು. KA-20-AA-8888 ನೋಂದಣಿ ಸಂಖ್ಯೆಯ ವಾಹನವನ್ನು ಪರಿಶೀಲನೆಗೆ ಹಾಜರುಪಡಿಸಿ, ಆರ್‌ಸಿ, ಖರೀದಿ ಬಿಲ್, ವಿಮೆ ಹಾಗೂ ಬಿ-ಎಕ್ಸ್‌ಟ್ರ್ಯಾಕ್ಟ್ ದಾಖಲೆಗಳನ್ನು ಸಲ್ಲಿಸಿದ್ದರು. ಎರಡು ತಿಂಗಳ ಕಂತುಗಳನ್ನೂ ಪಾವತಿಸಿದ್ದರು. ಆದರೆ ನಂತರ ಪರಿಶೀಲನೆ ನಡೆಸಿದಾಗ ವಾಹನಕ್ಕೆ ಸಂಬಂಧಿಸಿದಂತೆ ಸಲ್ಲಿಸಿದ್ದ ದಾಖಲೆಗಳೆಲ್ಲವೂ ನಕಲಿ ಎಂಬುದು ಪತ್ತೆಯಾಗಿದೆ. ಅಲ್ಲದೆ, ಮೊದಲ ಆರೋಪಿ ತನ್ನ ಹೆಸರಿನಲ್ಲಿರುವ ಹೊಸಂಗಡಿ ಗ್ರಾಮದ 45 ಸೆಂಟ್ಸ್ ಜಮೀನನ್ನು ಅಡಮಾನವಿಟ್ಟು 12 ಲಕ್ಷ ರೂ. ಸಾಲ ಪಡೆದಿದ್ದು, ಈ ಸಾಲ ಪಡೆಯುವ ಸಂದರ್ಭದಲ್ಲಿಯೂ ನಕಲಿ ದಾಖಲೆಗಳನ್ನು ಸಲ್ಲಿಸಿರುವುದು ಬ್ಯಾಂಕ್ ಅಧಿಕಾರಿಗಳ ಗಮನಕ್ಕೆ ಬಂದಿದೆ.
ಮೂರು ಪ್ರಕರಣಗಳಲ್ಲಿಯೂ ಆರೋಪಿಗಳು ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಅವುಗಳನ್ನು ಅಸಲಿ ಎಂದು ಬ್ಯಾಂಕ್ ಅಧಿಕಾರಿಗಳನ್ನು ನಂಬಿಸಿ ಸಾಲ ಪಡೆದು ವಂಚಿಸಿರುವುದಾಗಿ ದೂರಿನಲ್ಲಿ ಆರೋಪಿಸಲಾಗಿದೆ. ಒಟ್ಟಾರೆಯಾಗಿ ಈ ಮೂರು ಪ್ರಕರಣಗಳಲ್ಲಿ ವಾಹನ ಸಾಲ ಹಾಗೂ ಆಸ್ತಿ ಅಡಮಾನ ಸಾಲ ಸೇರಿ 74.24 ಲಕ್ಷ ರೂ. ಮೊತ್ತದ ಸಾಲ ವಿತರಣೆಯಾಗಿರುವುದು ದೂರಿನಲ್ಲಿ ಉಲ್ಲೇಖವಾಗಿದೆ.
ಈ ಸಂಬಂಧ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಮೂರು ಪ್ರತ್ಯೇಕ ಪ್ರಕರಣಗಳು ದಾಖಲಾಗಿವೆ.
