ಫುಲ್ಲರ್ಟನ್ (ಅಮೆರಿಕ): ಭಾರತದ ಅನುಭವಿ ಬ್ಯಾಡ್ಮಿಂಟನ್ ಆಟಗಾರ ಹಾಗೂ ಮಾಜಿ ವಿಶ್ವ ನಂ.1 ಕಿಡಂಬಿ ಶ್ರೀಕಾಂತ್ ಅವರು ಬಿಡಬ್ಲ್ಯುಎಫ್ ಯುಎಸ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಜಪಾನ್ನ ಯುದೈ ಒಕಿಮೋಟೊ ವಿರುದ್ಧ ರೋಚಕ ಜಯ ಸಾಧಿಸಿ, ಈ ವರ್ಷದ ತಮ್ಮ ಮೊದಲ ಫೈನಲ್ಗೆ ಪ್ರವೇಶಿಸಿದ್ದಾರೆ.
33 ವರ್ಷದ ಶ್ರೀಕಾಂತ್ ನಾಲ್ಕನೇ ಶ್ರೇಯಾಂಕಿತ ಯುದೈ ಒಕಿಮೋಟೊ ಅವರನ್ನು 22-20, 15-21, 21-19 ಅಂತರದಿಂದ ಒಂದು ಗಂಟೆ 12 ನಿಮಿಷಗಳ ಕಾಲ ನಡೆದ ಕಠಿಣ ಹೋರಾಟದಲ್ಲಿ ಮಣಿಸಿದರು.
ಮೊದಲ ಗೇಮ್ನಲ್ಲಿ ಶ್ರೀಕಾಂತ್ ಆರಂಭದಲ್ಲಿ 17-11 ಮುನ್ನಡೆ ಸಾಧಿಸಿದ್ದರು. ಆದರೆ ಒಕಿಮೋಟೊ ಅದ್ಭುತವಾಗಿ ಪುಟಿದೇಳಿ ಗೇಮ್ ಪಾಯಿಂಟ್ವರೆಗೆ ತಲುಪಿದರು. ಈ ವೇಳೆ ಒತ್ತಡಕ್ಕೆ ಮಣಿಯದ ಶ್ರೀಕಾಂತ್ ಗೇಮ್ ಪಾಯಿಂಟ್ ಉಳಿಸಿಕೊಂಡು ಸತತ ಎರಡು ಅಂಕಗಳನ್ನು ಗಳಿಸಿ ಮೊದಲ ಗೇಮ್ ತಮ್ಮದಾಗಿಸಿಕೊಂಡರು.
ಎರಡನೇ ಗೇಮ್ನಲ್ಲಿ ಜಪಾನ್ ಆಟಗಾರ ಉತ್ತಮ ಪ್ರದರ್ಶನ ನೀಡಿ 21-15 ಅಂತರದಿಂದ ಗೆದ್ದು ಪಂದ್ಯವನ್ನು ನಿರ್ಣಾಯಕ ಮೂರನೇ ಗೇಮ್ಗೆ ಕೊಂಡೊಯ್ದರು.
ನಿರ್ಣಾಯಕ ಗೇಮ್ ಕೂಡ ಮೊದಲ ಗೇಮ್ನಂತೆಯೇ ರೋಚಕವಾಗಿತ್ತು. ಶ್ರೀಕಾಂತ್ ಆರಂಭದಲ್ಲಿ 10-5 ಮುನ್ನಡೆ ಸಾಧಿಸಿದರೂ, ಒಕಿಮೋಟೊ 12-12ಕ್ಕೆ ಸಮಬಲ ಸಾಧಿಸಿದರು. ಬಳಿಕ ಶ್ರೀಕಾಂತ್ ಸತತ ಆರು ಅಂಕಗಳನ್ನು ಕಲೆಹಾಕಿ 18-12 ಮುನ್ನಡೆ ಪಡೆದರು. ಆದರೆ ಜಪಾನ್ ಆಟಗಾರವೂ ಸತತ ಐದು ಅಂಕಗಳನ್ನು ಪಡೆದು 18-18ಕ್ಕೆ ಸಮಬಲ ಸಾಧಿಸಿದರು.
ಕೊನೆಯ ಕ್ಷಣದಲ್ಲಿ ಅನುಭವದ ಆಟ ಪ್ರದರ್ಶಿಸಿದ ಶ್ರೀಕಾಂತ್ ತಮ್ಮ ವೇಗ ಮತ್ತು ಶಾಟ್ಗಳ ವೈವಿಧ್ಯತೆಯನ್ನು ಸಮರ್ಥವಾಗಿ ಬಳಸಿಕೊಂಡು 21-19 ಅಂತರದಿಂದ ಪಂದ್ಯ ಗೆದ್ದು ಫೈನಲ್ ಪ್ರವೇಶಿಸಿದರು.
ಫೈನಲ್ನಲ್ಲಿ ಶ್ರೀಕಾಂತ್ ಅವರು ಚೈನೀಸ್ ತೈಪೆಯ ಎಂಟನೇ ಶ್ರೇಯಾಂಕಿತ ಸು ಲಿ ಯಾಂಗ್ ಅವರನ್ನು ಎದುರಿಸಲಿದ್ದಾರೆ.
ಇನ್ನೊಂದೆಡೆ, ಭಾರತದ ಯುವ ಪ್ರತಿಭೆ ರೌನಕ್ ಚೌಹಾಣ್ ಅವರ ಅದ್ಭುತ ಅಭಿಯಾನ ಸೆಮಿಫೈನಲ್ನಲ್ಲಿ ಅಂತ್ಯಗೊಂಡಿತು.
ಕ್ವಾಲಿಫೈಯರ್ ಆಗಿ ಟೂರ್ನಿಗೆ ಪ್ರವೇಶಿಸಿದ್ದ 19 ವರ್ಷದ ರೌನಕ್, ಅರ್ಹತಾ ಸುತ್ತಿನ ಎರಡೂ ಪಂದ್ಯಗಳನ್ನು ಗೆದ್ದ ಬಳಿಕ ವಿಶ್ವ ರ್ಯಾಂಕಿಂಗ್ನಲ್ಲಿ 74ನೇ ಸ್ಥಾನದಲ್ಲಿದ್ದ ಸಂಕರ್ ಸುಬ್ರಮಣಿಯನ್ ಅವರನ್ನು ಸೋಲಿಸಿದ್ದರು.
ಅದರ ನಂತರ ಟೂರ್ನಿಯ ಅತಿ ದೊಡ್ಡ ಅಚ್ಚರಿ ಫಲಿತಾಂಶ ನೀಡಿದ್ದ ರೌನಕ್, ವಿಶ್ವದ 6ನೇ ಶ್ರೇಯಾಂಕಿತ ಚೌ ಟಿಯನ್ ಚೆನ್ ಅವರನ್ನು 21-17, 26-24 ಅಂತರದಿಂದ ಮಣಿಸಿ ಗಮನ ಸೆಳೆದಿದ್ದರು.
ಕ್ವಾರ್ಟರ್ಫೈನಲ್ನಲ್ಲಿ ಮಿಶಾ ಜಿಲ್ಬರ್ಮನ್ ವಿರುದ್ಧ 23-21, 21-11 ಅಂತರದ ಜಯ ದಾಖಲಿಸಿದ ಅವರು, ಸೆಮಿಫೈನಲ್ನಲ್ಲಿ ವಿಶ್ವ ನಂ.46 ಸು ಲಿ ಯಾಂಗ್ ವಿರುದ್ಧ 17-21, 19-21 ಅಂತರದಿಂದ ಸೋತು ಟೂರ್ನಿಯಿಂದ ಹೊರಬಿದ್ದರು.
ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಭಾರತದ ದೇವಿಕಾ ಸಿಹಾಗ್ ಅವರ ಅಭಿಯಾನವೂ ಸೆಮಿಫೈನಲ್ನಲ್ಲಿ ಅಂತ್ಯಗೊಂಡಿತು.
ಥೈಲ್ಯಾಂಡ್ ಮಾಸ್ಟರ್ಸ್ ಚಾಂಪಿಯನ್ ದೇವಿಕಾ ಮೊದಲ ಗೇಮ್ನಲ್ಲಿ ಡೆನ್ಮಾರ್ಕ್ನ ಎರಡನೇ ಶ್ರೇಯಾಂಕಿತ ಲೈನ್ ಕ್ರಿಸ್ಟೋಫರ್ಸನ್ ವಿರುದ್ಧ 21-15 ಅಂತರದಿಂದ ಗೆದ್ದು ಭರವಸೆ ಮೂಡಿಸಿದ್ದರು.
ಆದರೆ ನಂತರ ಚೇತರಿಸಿಕೊಂಡ ಕ್ರಿಸ್ಟೋಫರ್ಸನ್ ಎರಡನೇ ಹಾಗೂ ಮೂರನೇ ಗೇಮ್ಗಳನ್ನು ಕ್ರಮವಾಗಿ 21-11 ಮತ್ತು 21-15 ಅಂತರದಿಂದ ಗೆದ್ದು ಫೈನಲ್ಗೆ ಲಗ್ಗೆ ಇಟ್ಟರು.
ಕಳೆದ ವರ್ಷದ ಆಗಸ್ಟ್ನಲ್ಲಿ ನಡೆದ ಮಕಾವೊ ಓಪನ್ ಬಳಿಕ ಇದೇ ಮೊದಲ ಬಾರಿಗೆ ಲೈನ್ ಕ್ರಿಸ್ಟೋಫರ್ಸನ್ ಫೈನಲ್ ಪ್ರವೇಶಿಸಿರುವುದು ವಿಶೇಷವಾಗಿದೆ.
