ನವದೆಹಲಿ: ಸರ್ಕಾರದ ಮುಖ್ಯಸ್ಥರಾಗಿ 25 ವರ್ಷ ಪೂರ್ಣಗೊಳಿಸಿದ ಸಂದರ್ಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ, 2047ರ ವೇಳೆಗೆ ‘ವಿಕಸಿತ ಭಾರತ’ ನಿರ್ಮಿಸುವ ಗುರಿಗೆ ಹೊಸ ಉತ್ಸಾಹ ತುಂಬುವಂತೆ “ನಾವು ಮಾಡಿಯೇ ಮಾಡುತ್ತೇವೆ” ಎಂಬ ಘೋಷಣೆ ಮೊಳಗಿಸಿದರು.
ನವದೆಹಲಿಯಲ್ಲಿ ನಡೆದ ‘ವಿಕಸಿತ ಭಾರತ ಸಂಕಲ್ಪ ಸಭೆ’ಯಲ್ಲಿ ಮಾತನಾಡಿದ ಪ್ರಧಾನಿ, ಇದು ಕೇವಲ ಕಳೆದ 25 ವರ್ಷಗಳನ್ನು ಸ್ಮರಿಸುವ ಸಂದರ್ಭವಲ್ಲ, ದೇಶದ ಮುಂದಿನ ಗುರಿಗಳತ್ತ ಹೊಸ ಶಕ್ತಿ ಮತ್ತು ಸಂಕಲ್ಪದೊಂದಿಗೆ ಸಾಗುವ ಸಮಯ ಎಂದು ಹೇಳಿದರು. ಮೋದಿ ಘೋಷಣೆಗೆ ಸಭೆಯಲ್ಲಿ ನೆರೆದಿದ್ದ ಜನರು ಒಕ್ಕೊರಲಿನಿಂದ ಪ್ರತಿಧ್ವನಿಸಿದರು.
2047ರ ವೇಳೆಗೆ ವಿಕಸಿತ ಭಾರತ ನಿರ್ಮಾಣ, ವಿಶ್ವದ ಅಗ್ರ ಮೂರು ಆರ್ಥಿಕ ಶಕ್ತಿಗಳ ಪಟ್ಟಿಗೆ ಸೇರುವುದು, ಆತ್ಮನಿರ್ಭರ ಭಾರತ, ಜಾಗತಿಕ ಉತ್ಪಾದನಾ ಕೇಂದ್ರವಾಗುವುದು, ಒಲಿಂಪಿಕ್ಸ್ ಆಯೋಜನೆ ಹಾಗೂ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಮತ್ತಷ್ಟು ಹೆಜ್ಜೆ ಇಡುವುದು ಸೇರಿದಂತೆ ಹಲವು ಗುರಿಗಳನ್ನು ಮೋದಿ ಪ್ರಸ್ತಾಪಿಸಿದರು. ಪ್ರತಿಯೊಂದು ಗುರಿಯ ಬಳಿಕವೂ “ನಾವು ಮಾಡಿಯೇ ಮಾಡುತ್ತೇವೆ” ಎಂದು ಹೇಳುವಂತೆ ಸಭಿಕರಿಗೆ ಕರೆ ನೀಡಿದರು.
ತಮ್ಮ 25 ವರ್ಷಗಳ ಸಾರ್ವಜನಿಕ ಸೇವೆಯನ್ನು ಉಲ್ಲೇಖಿಸಿದ ಮೋದಿ, ತಮ್ಮ ವೈಯಕ್ತಿಕ ಪಯಣಕ್ಕಿಂತ ಈ ಅವಧಿಯಲ್ಲಿ ಭಾರತ ಸಾಧಿಸಿರುವ ಪ್ರಗತಿಯನ್ನು ಗಮನಿಸುವುದು ಮುಖ್ಯ ಎಂದರು.
ಗುಜರಾತ್ ಮುಖ್ಯಮಂತ್ರಿಯಾಗಿದ್ದ ಅವಧಿಯನ್ನು ನೆನಪಿಸಿಕೊಂಡ ಅವರು, “ಗುಜರಾತ್‌ನ ಅಭಿವೃದ್ಧಿಯೇ ದೇಶದ ಅಭಿವೃದ್ಧಿ” ಎಂಬ ದೃಷ್ಟಿಕೋನದೊಂದಿಗೆ ಕೆಲಸ ಮಾಡಿದ್ದಾಗಿ ಹೇಳಿದರು. ಜನರ ಮೇಲಿನ ನಂಬಿಕೆಯನ್ನು ತಮ್ಮ ಶಕ್ತಿಯನ್ನಾಗಿ ಮಾಡಿಕೊಂಡು, ಜನರನ್ನು ಒಳಗೊಳ್ಳುವ ಮೂಲಕ ನಿರ್ಧಾರ, ನೀತಿ ರೂಪಣೆ ಮತ್ತು ಅನುಷ್ಠಾನಕ್ಕೆ ಒತ್ತು ನೀಡಿದ್ದಾಗಿ ತಿಳಿಸಿದರು.
2014ಕ್ಕೂ ಮುನ್ನ ದೇಶದಲ್ಲಿ ನಿರಾಶೆ ಮತ್ತು ಆತಂಕದ ವಾತಾವರಣವಿತ್ತು ಎಂದು ಹೇಳಿದ ಮೋದಿ, ಆರ್ಥಿಕತೆ, ಹಣದುಬ್ಬರ ಸೇರಿದಂತೆ ಹಲವು ಸವಾಲುಗಳು ಎದುರಾಗಿದ್ದವು ಎಂದು ಪ್ರತಿಪಾದಿಸಿದರು. ಜನರ ಸಾಮೂಹಿಕ ಶಕ್ತಿಯನ್ನು ಒಗ್ಗೂಡಿಸಿ ಹೊಸ ಆತ್ಮವಿಶ್ವಾಸ ಮೂಡಿಸಲು ಪ್ರಯತ್ನಿಸಿದ್ದಾಗಿ ಹೇಳಿದರು.
2015ರಿಂದ 2025ರವರೆಗಿನ ದಶಕ ಕೃಷಿ ಬೆಳವಣಿಗೆಯಲ್ಲಿ ದಾಖಲೆ ನಿರ್ಮಿಸಿದೆ ಎಂದು ಮೋದಿ ಹೇಳಿದರು. ಸರ್ಕಾರದ ‘ಸಂತೃಪ್ತಿ’ (Saturation) ನೀತಿಯಡಿ ಅರ್ಹ ಪ್ರತಿಯೊಬ್ಬ ಫಲಾನುಭವಿಗೂ ಯೋಜನೆಗಳ ಪ್ರಯೋಜನ ತಲುಪಿಸುವ ಗುರಿ ಹೊಂದಲಾಗಿದೆ ಎಂದರು.
140 ಕೋಟಿಗೂ ಹೆಚ್ಚು ಭಾರತೀಯರು ಒಗ್ಗಟ್ಟಿನಿಂದ ಕೆಲಸ ಮಾಡಿದರೆ 2047ರ ವೇಳೆಗೆ ವಿಕಸಿತ ಭಾರತ ನಿರ್ಮಾಣ ಸಾಧ್ಯ ಎಂದು ಪ್ರಧಾನಿ ಹೇಳಿದರು. ದೇಶದ ಸಮಸ್ಯೆಗಳಿಗೆ 140 ಕೋಟಿ ಪರಿಹಾರಗಳಿವೆ ಎಂದ ಅವರು, ವಿಶ್ರಾಂತಿಯ ಸಮಯ ಇದಲ್ಲ, ಮುಂದೆ ಸಾಗುವ ಸಮಯ ಎಂದು ಕರೆ ನೀಡಿದರು.
ಇತ್ತೀಚೆಗೆ ಧೈರ್ಯಕ್ಕಾಗಿ ಗಮನ ಸೆಳೆದ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರನ್ನು ಪ್ರಧಾನಿ ಸ್ಮರಿಸಿದರು. ಇಂದು ಭಾರತೀಯ ಪೈಲಟ್ ಬಗ್ಗೆ ಜಗತ್ತು ಮಾತನಾಡುತ್ತಿದೆ; ಮುಂದೊಂದು ದಿನ ‘ಮೇಡ್ ಇನ್ ಇಂಡಿಯಾ’ ವಿಮಾನಗಳ ಬಗ್ಗೆಯೂ ಜಗತ್ತು ಮಾತನಾಡುವ ದಿನ ಬರಲಿದೆ ಎಂದು ಹೇಳಿದರು.
ಪ್ರಸ್ತುತ ದೂರದೃಷ್ಟಿಯ ನೀತಿಗಳನ್ನು ರೂಪಿಸಿ, ಗುರಿ ಸಾಧನೆಗಾಗಿ ಗರಿಷ್ಠ ಪರಿಶ್ರಮ ಪಡಬೇಕಿದೆ ಎಂದ ಮೋದಿ, ಪ್ರತಿಯೊಂದು ಬಿಕ್ಕಟ್ಟೂ ತಾಳ್ಮೆಯ ಪರೀಕ್ಷೆಯಾಗಿದ್ದು, ಪ್ರತಿಯೊಂದು ಯಶಸ್ಸೂ ದೇಶದ ಮೇಲಿನ ಹೊಣೆಗಾರಿಕೆಯನ್ನು ಹೆಚ್ಚಿಸಿದೆ ಎಂದು ಹೇಳಿದರು.
ತಾನು ಸದಾ ಕಲಿಯುವ ವಿದ್ಯಾರ್ಥಿಯೇ ಎಂದು ಹೇಳಿದ ಪ್ರಧಾನಿ, ಹೆಚ್ಚು ಕಲಿತಷ್ಟೂ ದೇಶಕ್ಕಾಗಿ ಹೆಚ್ಚಿನ ಕೆಲಸ ಮಾಡುವ ಸಾಮರ್ಥ್ಯ ಹೆಚ್ಚುತ್ತದೆ ಎಂದರು. “ಯಾವುದೇ ಘಟನೆ ವ್ಯರ್ಥವಾಗಿಲ್ಲ; ಪ್ರತಿಯೊಂದು ಘಟನೆ ನನಗೆ ಏನನ್ನೋ ಕಲಿಸಿದೆ” ಎಂದು ತಮ್ಮ ಸಾರ್ವಜನಿಕ ಬದುಕಿನ ಅನುಭವವನ್ನು ಮೋದಿ ವಿವರಿಸಿದರು.
