ಮುಂಬೈ: ಗಡಿಯಲ್ಲಿ ದೇಶರಕ್ಷಣೆಗೆ ನಿಂತಿರುವ ಸೈನಿಕರ ತ್ಯಾಗವನ್ನು ಅಭಿವೃದ್ಧಿ ಯೋಜನೆಗಳಿಗಾಗಿ ಮರಗಳನ್ನು, ವಿಶೇಷವಾಗಿ ಮ್ಯಾಂಗ್ರೋವ್ಗಳನ್ನು, ಕಡಿಯುವುದರೊಂದಿಗೆ ಹೋಲಿಸಿದ ಮಹಾರಾಷ್ಟ್ರ ಪರಿಸರ ಸಚಿವೆ ಪಂಕಜಾ ಮುಂಡೆ ಅವರ ಹೇಳಿಕೆ ತೀವ್ರ ವಿವಾದಕ್ಕೆ ಕಾರಣವಾಗಿದೆ.
ಸಾಮಾಜಿಕ ಮಾಧ್ಯಮಗಳಲ್ಲಿ ವಿಡಿಯೊ ವೈರಲ್ ಆಗಿದ್ದು, ರಾಜಕೀಯ ಹಾಗೂ ಪರಿಸರ ವಲಯಗಳಿಂದ ಟೀಕೆಗಳು ಕೇಳಿಬಂದಿವೆ.
“ಅಭಿವೃದ್ಧಿಗೆ ಕೆಲವೊಮ್ಮೆ ಮರಗಳನ್ನು ಕಡಿಸಬೇಕು”
‘ಮುಂಬೈ ಕ್ಲೈಮೇಟ್ ವೀಕ್’ ಅಂಗವಾಗಿ ನಡೆದ ಸಂವಾದದಲ್ಲಿ ಮಾತನಾಡಿದ ಸಚಿವೆ, ಅಭಿವೃದ್ಧಿ ಯೋಜನೆಗಳಿಗಾಗಿ ಮರ ಕಡಿಯುವಿಕೆ ಕುರಿತು ಪ್ರಶ್ನೆಗೆ ಉತ್ತರಿಸಿದರು.
“ಒಬ್ಬ ತಾಯಿ ತನ್ನ ಮಗನನ್ನು ಬೆಳೆಸಿ ನಂತರ ದೇಶಕ್ಕಾಗಿ ಗಡಿಗೆ ಕಳುಹಿಸುವ ಧೈರ್ಯ ಹೊಂದಿರುವಂತೆ, ನಾವು ಮರಗಳನ್ನು ಬೆಳೆಸಿದರೆ ಕೆಲವೊಮ್ಮೆ ಅವುಗಳನ್ನು ಕಡಿಯಬೇಕಾಗಬಹುದು. ಆದರೆ ಅವುಗಳಿಗೆ ಬದಲಾಗಿ ಬೇರೆಡೆ ಮರಗಳನ್ನು ನೆಡಬಹುದು,” ಎಂದು ಹೇಳಿದರು.
“ಅಭಿವೃದ್ಧಿಗೆ ಐದು ಮರಗಳನ್ನು ಕಡಿಯಬೇಕಾದರೆ, ಹತ್ತು ಮರಗಳನ್ನು ನೆಡಬಹುದು. ಮರಗಳ ಸಂರಕ್ಷಣೆಯ ಹೆಸರಿನಲ್ಲಿ ಅಭಿವೃದ್ಧಿಗೆ ಸಂಪೂರ್ಣ ವಿರೋಧ ಹೇಳಲು ಸಾಧ್ಯವಿಲ್ಲ,” ಎಂದು ಅವರು ಸಮರ್ಥಿಸಿಕೊಂಡರು.
“ಮರಗಳನ್ನು ಸೈನಿಕರಂತೆ ಭಾವಿಸಿ”
ಮರಗಳನ್ನು ಸೈನಿಕರೊಂದಿಗೆ ಹೋಲಿಸಿದ ಅವರು, “ಅವು ಬದುಕಿರುವವರೆಗೂ ನಮ್ಮನ್ನು ರಕ್ಷಿಸುತ್ತವೆ. ಕಡಿದರೂ ಅಭಿವೃದ್ಧಿಗೆ ಕೆಲಸ ಮಾಡುತ್ತವೆ,” ಎಂದು ಹೇಳಿದ್ದಾರೆ.
ಹವಾಮಾನ ಚರ್ಚೆಗಳ ಬಗ್ಗೆ ಮಾತನಾಡುತ್ತಾ, “ಜನರು ಪಂಚತಾರಾ ಹೋಟೆಲ್ಗಳಲ್ಲಿ ಕುಳಿತು ಹವಾಮಾನ ಸಮಸ್ಯೆಗಳ ಬಗ್ಗೆ ಮಾತನಾಡುತ್ತಾರೆ. ಆದರೆ ಸೈನಿಕರು ಹಿಮ ಮತ್ತು ಮರುಭೂಮಿಗಳಲ್ಲಿ ಪ್ರಾಣ ಪಣಕ್ಕಿಟ್ಟು ದೇಶ ಕಾಪಾಡುತ್ತಿದ್ದಾರೆ. ಆ ದೃಷ್ಟಿಯಲ್ಲಿ ನಾನು ಮರಗಳನ್ನು ನೋಡುತ್ತೇನೆ. ಇವು ನನ್ನ ವೈಯಕ್ತಿಕ ಅಭಿಪ್ರಾಯಗಳು,” ಎಂದರು.
ಸಾಮಾಜಿಕ ಜಾಲತಾಣಗಳಲ್ಲಿ ಟೀಕೆ ಸಚಿವರ ಹೇಳಿಕೆಯ ವಿಡಿಯೊವನ್ನು ಸಾಮಾಜಿಕ ಕಾರ್ಯಕರ್ತೆ ಅಂಜಲಿ ದಮಾನಿಯಾ X ನಲ್ಲಿ ಹಂಚಿಕೊಂಡಿದ್ದು, ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ವಿಡಿಯೊ ವೈರಲ್ ಆದ ಬಳಿಕ ಅನೇಕರು ಹೇಳಿಕೆಯನ್ನು ಟೀಕಿಸಿದ್ದಾರೆ.
ಈ ಹೇಳಿಕೆ ಅಭಿವೃದ್ಧಿ ಮತ್ತು ಪರಿಸರ ಸಂರಕ್ಷಣೆಯ ನಡುವಿನ ಸಮತೋಲನದ ಕುರಿತು ಮತ್ತೆ ಚರ್ಚೆ ಹುಟ್ಟುಹಾಕಿದೆ
