ಟೊಯೋಟಾ: ಭಾರತದ ಶೂಟರ್ ಈಶಾ ಸಿಂಗ್ ಏಷ್ಯನ್ ಗೇಮ್ಸ್ 2026ರಲ್ಲಿ ಅದ್ಭುತ ಹೋರಾಟ ಪ್ರದರ್ಶಿಸಿ ಮಹಿಳೆಯರ 25 ಮೀಟರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ. ಸೋಮವಾರ ನಡೆದ ರೋಚಕ ಫೈನಲ್ನಲ್ಲಿ ಹಲವು ಶೂಟ್ಆಫ್ಗಳನ್ನು ಎದುರಿಸಿದ ಈಶಾ, ಕೊನೆ ಹಂತದಲ್ಲಿ ಚಿನ್ನದ ಪದಕದಿಂದ ವಂಚಿತರಾದರೂ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕಿದರು.
ಈಶಾ ಸಿಂಗ್ಗೆ ಇದು ಏಷ್ಯನ್ ಗೇಮ್ಸ್ನಲ್ಲಿ ಮೂರನೇ ಬೆಳ್ಳಿ ಪದಕವಾಗಿದೆ. 2023ರ ಹ್ಯಾಂಗ್ಝೌ ಏಷ್ಯನ್ ಗೇಮ್ಸ್ನಲ್ಲಿ ಅವರು ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್ ವೈಯಕ್ತಿಕ ಹಾಗೂ ತಂಡ ಸ್ಪರ್ಧೆಗಳಲ್ಲಿ ಬೆಳ್ಳಿ ಗೆದ್ದಿದ್ದರು.
ಫೈನಲ್ಗೆ ಈಶಾ 580-22x ಅಂಕಗಳೊಂದಿಗೆ ಎಂಟನೇ ಸ್ಥಾನದಲ್ಲಿ ಅರ್ಹತೆ ಪಡೆದಿದ್ದರು. ಆದರೆ ಪದಕ ಸುತ್ತಿನಲ್ಲಿ ಅದ್ಭುತ ಆರಂಭ ಮಾಡಿದರು. ಮೊದಲ ಸರಣಿಯಲ್ಲೇ ಐದಕ್ಕೆ ಐದು ಗುರಿ ಹೊಡೆದು ಪದಕದ ಸ್ಪರ್ಧೆಯಲ್ಲಿ ಮುಂಚೂಣಿಗೆ ಬಂದರು.
ಚೀನಾದ ಕ್ಸಿಯಾವೊ ಜಿಯಾರುಯ್ಕ್ಸುವಾನ್ ಮತ್ತು ಉತ್ತರ ಕೊರಿಯಾದ ಕಿಮ್ ಹ್ಯೊನ್ ಸುಕ್ ಅವರೊಂದಿಗೆ ಈಶಾ ತೀವ್ರ ಪೈಪೋಟಿ ನಡೆಸಿದರು. ಎಲಿಮಿನೇಷನ್ ಹಂತದಲ್ಲಿ ಮೂರು ಹಿಟ್ಗಳಿಗೆ ಕುಸಿದರೂ, ಮುಂದಿನ ಸರಣಿಯಲ್ಲಿ 5/5 ಸಾಧಿಸಿ ಮತ್ತೆ ಪದಕದ ಹೋರಾಟದಲ್ಲಿ ಉಳಿದರು.
ಕಂಚಿನ ಪದಕದ ಹೋರಾಟದಲ್ಲಿ ಈಶಾ ಮತ್ತು ಕಿಮ್ 34 ಹಿಟ್ಗಳಲ್ಲಿ ಸಮಬಲ ಸಾಧಿಸಿದ ಹಿನ್ನೆಲೆಯಲ್ಲಿ ಹಲವು ಶೂಟ್ಆಫ್ಗಳು ನಡೆದವು. ಕೊನೆಗೆ ಈಶಾ ಮೇಲುಗೈ ಸಾಧಿಸಿ ಚಿನ್ನದ ಪದಕದ ಹೋರಾಟಕ್ಕೆ ಪ್ರವೇಶಿಸಿದರು.
ಚಿನ್ನಕ್ಕಾಗಿ ಚೀನಾದ ಕ್ಸಿಯಾವೊ ವಿರುದ್ಧದ ಅಂತಿಮ ಹೋರಾಟದಲ್ಲೂ ರೋಚಕತೆ ಮುಂದುವರಿಯಿತು. ಈಶಾ ನಾಲ್ಕು ಹಿಟ್ಗಳನ್ನು ದಾಖಲಿಸಿ ಸಮಬಲ ಸಾಧಿಸಲು ಕಾರಣರಾದರು. ನಂತರ ನಡೆದ ಮತ್ತೊಂದು ಶೂಟ್ಆಫ್ನಲ್ಲಿ ಈಶಾ ಎರಡು ಹಿಟ್ಗಳನ್ನು ಗಳಿಸಿದರೆ, ಕ್ಸಿಯಾವೊ ಮೂರು ಹಿಟ್ಗಳನ್ನು ದಾಖಲಿಸಿ ಚಿನ್ನ ಗೆದ್ದರು.
ಇಬ್ಬರ ಒಟ್ಟು 38 ಹಿಟ್ಗಳು ದಾಖಲಾಗಿದ್ದು, ಇದು 2023ರ ಹ್ಯಾಂಗ್ಝೌ ಏಷ್ಯನ್ ಗೇಮ್ಸ್ನಲ್ಲಿ ಚೀನಾದ ಲಿಯು ರುಯಿ ನಿರ್ಮಿಸಿದ್ದ ಗೇಮ್ಸ್ ದಾಖಲೆಗೆ ಸಮವಾಗಿದೆ.
ಈಶಾ ಪ್ರಸ್ತುತ ಮಹಿಳೆಯರ 25 ಮೀಟರ್ ಪಿಸ್ತೂಲ್ನಲ್ಲಿ ವಿಶ್ವ ನಂ.1 ಸ್ಥಾನದಲ್ಲಿದ್ದು, ಮುನಿಚ್ ವಿಶ್ವಕಪ್ನಲ್ಲಿ 43 ಹಿಟ್ಗಳೊಂದಿಗೆ ವಿಶ್ವದಾಖಲೆಯನ್ನೂ ಹೊಂದಿದ್ದಾರೆ.
ಇದಕ್ಕೂ ಮುನ್ನ ನಡೆದ ತಂಡ ಸ್ಪರ್ಧೆಯಲ್ಲಿ ಭಾರತ ಐದನೇ ಸ್ಥಾನಕ್ಕೆ ತೃಪ್ತಿಪಟ್ಟಿತ್ತು. ಮನೂ ಭಾಕರ್ 11ನೇ ಹಾಗೂ ರಾಹಿ ಸರ್ನೋಬತ್ 30ನೇ ಸ್ಥಾನ ಪಡೆದರೆ, ಈಶಾ ಮಾತ್ರ ವೈಯಕ್ತಿಕ ಫೈನಲ್ಗೆ ಅರ್ಹತೆ ಪಡೆದಿದ್ದರು.
