ಬೆಂಗಳೂರು: ದೇಶದ ವಿವಿಧ ರಾಜ್ಯಗಳು ಹಾಗೂ ಸಂಘಟನೆಗಳನ್ನು ಪ್ರತಿನಿಧಿಸುವ 44ನೇ ಜೂನಿಯರ್ ರಾಷ್ಟ್ರೀಯ ಖೋ-ಖೋ ಚಾಂಪಿಯನ್ಶಿಪ್ಗೆ ಬುಧವಾರ ಬೆಂಗಳೂರು ಸಮೀಪದ ಗುಂಜೂರಿನ ಅಟಲ್ ಬಿಹಾರಿ ವಾಜಪೇಯಿ ಕ್ರೀಡಾಂಗಣದಲ್ಲಿ ಅದ್ಧೂರಿ ಚಾಲನೆ ದೊರಕಿತು.
ಚಾಂಪಿಯನ್ಶಿಪ್ನ ಮೊದಲ ದಿನವೇ ಹುಡುಗಿಯರು ಹಾಗೂ ಹುಡುಗರ ವಿಭಾಗಗಳಲ್ಲಿ ಸುಮಾರು 40 ಪಂದ್ಯಗಳು ನಡೆದಿದ್ದು, ಕ್ರೀಡಾಭಿಮಾನಿಗಳಿಗೆ ರೋಚಕ ಕ್ರೀಡೋತ್ಸವದ ಅನುಭವ ಒದಗಿಸಿತು. ಲೀಗ್-ಕಮ್-ನಾಕ್ ಔಟ್ ಮಾದರಿಯಲ್ಲಿ ನಡೆಯುತ್ತಿರುವ ಈ ಟೂರ್ನಿಯ ಸೆಮಿಫೈನಲ್ ಪಂದ್ಯಗಳು ಜನವರಿ 3ರಂದು ಹಾಗೂ ಫೈನಲ್ ಪಂದ್ಯಗಳು ಜನವರಿ 4ರಂದು ನಡೆಯಲಿವೆ.
ಜೂನಿಯರ್ ರಾಷ್ಟ್ರೀಯ ಚಾಂಪಿಯನ್ಶಿಪ್ನಲ್ಲಿ ಸುಮಾರು 1,000ಕ್ಕೂ ಹೆಚ್ಚು ಆಟಗಾರರು ಭಾಗವಹಿಸುತ್ತಿದ್ದು, ಟೂರ್ನಿಯ ಸುವ್ಯವಸ್ಥಿತ ನಿರ್ವಹಣೆಗೆ 180 ಸಹಾಯಕ ಸಿಬ್ಬಂದಿ ಮತ್ತು 100 ತಾಂತ್ರಿಕ ಅಧಿಕಾರಿಗಳನ್ನು ನಿಯೋಜಿಸಲಾಗಿದೆ.
ಉದ್ಘಾಟನಾ ಸಮಾರಂಭದಲ್ಲಿ ಮಾಜಿ ಸಚಿವ ಎಚ್. ನಾಗೇಶ್ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದರು. ಖೋ-ಖೋ ಫೆಡರೇಶನ್ ಆಫ್ ಇಂಡಿಯಾ (ಕೆಕೆಎಫ್ಐ) ಹಾಗೂ ಕರ್ನಾಟಕ ರಾಜ್ಯ ಖೋ-ಖೋ ಅಸೋಸಿಯೇಷನ್ (ಕೆಎಸ್ಕೆಕೆಎ)ನ ಪದಾಧಿಕಾರಿಗಳು ಮತ್ತು ಕಾರ್ಯಕಾರಿ ಸಮಿತಿ ಸದಸ್ಯರು ಉಪಸ್ಥಿತರಿದ್ದರು.
ಕೆಕೆಎಫ್ಐ ಅಧ್ಯಕ್ಷ ಸುಧಾಂಶು ಮಿತ್ತಲ್ ಮಾತನಾಡಿ, “ವಿವಿಧ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಿಂದ ತಂಡಗಳು ಭಾಗವಹಿಸಿರುವುದು ಸಣ್ಣ ಭಾರತವನ್ನು ಇಲ್ಲಿ ಪ್ರತಿನಿಧಿಸಿದಂತಿದೆ. ಯುವ ಆಟಗಾರರಿಗೆ ಪರಸ್ಪರ ಸಂವಾದ ನಡೆಸಿ, ಒಬ್ಬರನ್ನೊಬ್ಬರು ಕಲಿಯುವ ಅಪರೂಪದ ಅವಕಾಶ ಇದು” ಎಂದರು.
ಕರ್ನಾಟಕ ರಾಜ್ಯ ಖೋ-ಖೋ ಅಸೋಸಿಯೇಷನ್ ಅಧ್ಯಕ್ಷ ಲೋಕೇಶ್ವರ ಅವರು, “ಈ ಯುವ ಪ್ರತಿಭೆಗಳಿಗೆ ಭವಿಷ್ಯ ಉಜ್ವಲವಾಗಿದೆ. ತರಬೇತಿ, ಸೌಲಭ್ಯಗಳು ಮತ್ತು ಮಾರ್ಗದರ್ಶನದ ವಿಷಯದಲ್ಲಿ ಅತ್ಯುತ್ತಮ ವ್ಯವಸ್ಥೆ ಒದಗಿಸಲಾಗುತ್ತಿದೆ” ಎಂದು ತಿಳಿಸಿದರು.
ಕೆಕೆಎಫ್ಐ ಪ್ರಧಾನ ಕಾರ್ಯದರ್ಶಿ ಉಪ್ಕಾರ್ ಸಿಂಗ್ ವೀರ್ಕ್ ಮಾತನಾಡಿ, “ಜೂನಿಯರ್ ನ್ಯಾಷನಲ್ಸ್ ಯುವ ಪ್ರತಿಭೆಗಳನ್ನು ಗುರುತಿಸಿ ಬೆಳೆಸುವ ವೇದಿಕೆಯಾಗಿದೆ. ಖೋ-ಖೋ ಈಗ ಆಧುನಿಕ ಕ್ರೀಡೆಯಂತೆ ಅವಕಾಶಗಳು ಮತ್ತು ಗೌರವ ಒದಗಿಸುವ ಕ್ರೀಡೆಯಾಗಿ ರೂಪುಗೊಂಡಿದೆ” ಎಂದರು.
ಕೆಕೆಎಫ್ಐ ಸಂಘಟನೆ ಮತ್ತು ಆಡಳಿತ ವಿಭಾಗದ ಅಧ್ಯಕ್ಷ ಡಾ. ಎಂ.ಎಸ್. ತ್ಯಾಗಿ ಅವರು, “ಯುವ ಪೀಳಿಗೆಯ ಆಟಗಾರರು ಇಷ್ಟೊಂದು ಉತ್ಸಾಹ ಮತ್ತು ಶಕ್ತಿಯಿಂದ ಈ ಕ್ರೀಡೆಯನ್ನು ಅಳವಡಿಸಿಕೊಂಡಿರುವುದು ಸಂತಸದ ವಿಷಯ. ಜೂನಿಯರ್ ನ್ಯಾಷನಲ್ ಚಾಂಪಿಯನ್ಶಿಪ್ ಯುವ ಆಟಗಾರರಿಗೆ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಿ ವೃತ್ತಿಜೀವನದಲ್ಲಿ ಮುನ್ನಡೆಯಲು ಮಹತ್ವದ ವೇದಿಕೆಯಾಗುತ್ತದೆ” ಎಂದು ಹೇಳಿದರು.
ಇದೇ ಸಂದರ್ಭದಲ್ಲಿ ಮುಂದಿನ ರಾಷ್ಟ್ರೀಯ ಟೂರ್ನಿಗಳ ವಿವರವನ್ನು ಪ್ರಕಟಿಸಲಾಗಿದ್ದು, 58ನೇ ಸೀನಿಯರ್ ರಾಷ್ಟ್ರೀಯ ಖೋ-ಖೋ ಚಾಂಪಿಯನ್ಶಿಪ್ (ಪುರುಷರು ಮತ್ತು ಮಹಿಳೆಯರು) 2025-26 ಜನವರಿ 11ರಿಂದ 15ರವರೆಗೆ ತೆಲಂಗಾಣದ ಕಾಜಿಪೇಟೆಯಲ್ಲಿ ನಡೆಯಲಿದೆ. 35ನೇ ಸಬ್-ಜೂನಿಯರ್ ರಾಷ್ಟ್ರೀಯ ಖೋ-ಖೋ ಚಾಂಪಿಯನ್ಶಿಪ್ (ಹುಡುಗರು ಮತ್ತು ಹುಡುಗಿಯರು) 2025-26 ಹರಿಯಾಣದ ಕುರುಕ್ಷೇತ್ರದಲ್ಲಿ ಜನವರಿ 31ರಿಂದ ಫೆಬ್ರವರಿ 4, 2026ರವರೆಗೆ ಆಯೋಜಿಸಲಾಗುತ್ತದೆ.
