ಲಂಡನ್: ಲೇಬರ್ ಪಕ್ಷದ ನಾಯಕ ಕೀರ್ ಸ್ಟಾರ್ಮರ್ ಬ್ರಿಟನ್ ಪ್ರಧಾನಿ ಹುದ್ದೆಗೆ ರಾಜೀನಾಮೆ ನೀಡುವುದಾಗಿ ಘೋಷಿಸಿದ್ದಾರೆ. ಪಕ್ಷದೊಳಗಿನ ಒತ್ತಡ ಹೆಚ್ಚುತ್ತಿರುವ ನಡುವೆಯೇ ಅವರು ಈ ನಿರ್ಧಾರ ಕೈಗೊಂಡಿದ್ದಾರೆ.
ರಾಜೀನಾಮೆ ಘೋಷಣೆಗೆ ಮುನ್ನ ಪತ್ನಿಯೊಂದಿಗೆ 10 ಡೌನಿಂಗ್ ಸ್ಟ್ರೀಟ್ ನಿಂದ ಹೊರಬಂದ ಸ್ಟಾರ್ಮರ್ ಅವರಿಗೆ ಬೆಂಬಲಿಗರು ಚಪ್ಪಾಳೆ ತಟ್ಟಿ ಬೀಳ್ಕೊಟ್ಟರು. ಎರಡು ವರ್ಷಗಳ ಹಿಂದೆ ಡೌನಿಂಗ್ ಸ್ಟ್ರೀಟ್ ಗೆ ಪ್ರವೇಶಿಸಿದ್ದ ಕ್ಷಣವನ್ನು ತಮ್ಮ ಜೀವನದ ‘ಹೆಮ್ಮೆಯ ಕ್ಷಣ’ ಎಂದು ಅವರು ಸ್ಮರಿಸಿದರು.
‘ಲಕ್ಷಾಂತರ ಜನರ ಬದುಕಿನಲ್ಲಿ ಬದಲಾವಣೆ ತರಬೇಕೆಂಬ ಉದ್ದೇಶದಿಂದಲೇ ನಾನು ರಾಜಕೀಯಕ್ಕೆ ಬಂದಿದ್ದೆ’ ಎಂದು ಅವರು ಹೇಳಿದರು.
2024ರ ಸಾರ್ವತ್ರಿಕ ಚುನಾವಣೆಯಲ್ಲಿ ಲೇಬರ್ ಪಕ್ಷದ ಭರ್ಜರಿ ಗೆಲುವನ್ನು ಉಲ್ಲೇಖಿಸಿದ ಸ್ಟಾರ್ಮರ್, ತಮ್ಮ ಸರಕಾರದ ಸಾಧನೆಗಳನ್ನು ವಿವರಿಸಿದರು. ಆರ್ಥಿಕ ಬೆಳವಣಿಗೆ, ವೇತನ ಏರಿಕೆ, ಹೂಡಿಕೆ ಹೆಚ್ಚಳ, ಮೂಲಸೌಕರ್ಯ ಅಭಿವೃದ್ಧಿ, ರಾಷ್ಟ್ರೀಯ ಆರೋಗ್ಯ ಸೇವೆ(NHS)ಯ ಕಾಯುವಿಕೆ ಪಟ್ಟಿಗಳ ಇಳಿಕೆ, ಕಾರ್ಮಿಕರು ಮತ್ತು ಬಾಡಿಗೆದಾರರ ಹಕ್ಕುಗಳ ವಿಸ್ತರಣೆ, ರಕ್ಷಣಾ ವೆಚ್ಚದ ಹೆಚ್ಚಳ, ಅಕ್ರಮ ವಲಸೆ ನಿಯಂತ್ರಣ ಹಾಗೂ ಮಕ್ಕಳ ಬಡತನ ನಿವಾರಣೆಗೆ ಕೈಗೊಂಡ ಕ್ರಮಗಳನ್ನು ಅವರು ಪ್ರಸ್ತಾಪಿಸಿದರು.
‘ನಾನು ತೆಗೆದುಕೊಂಡ ಪ್ರತಿಯೊಂದು ನಿರ್ಧಾರವೂ ದೇಶದ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡೇ ಆಗಿದೆ. ನಮ್ಮ ಸರಕಾರ ಅಧಿಕಾರಕ್ಕೆ ಬಂದ ಬಳಿಕ ಆರ್ಥಿಕತೆ ಬಲಗೊಂಡಿದೆ. ವೇತನಗಳು ಹಣದುಬ್ಬರದ ಪ್ರಮಾಣಕ್ಕಿಂತ ವೇಗವಾಗಿ ಏರಿಕೆ ಕಂಡಿವೆ’ ಎಂದು ಸ್ಟಾರ್ಮರ್ ಹೇಳಿದರು.
