ನವದೆಹಲಿ: ಲಷ್ಕರ್-ಎ-ತೈಬಾ ಸಂಘಟನೆ ‘ಆಪರೇಶನ್ ಸಿಂಧೂರ್’ ಬಳಿಕ ಭಾರೀ ಹಿನ್ನಡೆ ಅನುಭವಿಸಿದ ನಂತರ ಪುನರ್ಸಂಘಟನೆ ಕಾರ್ಯದಲ್ಲಿ ತೊಡಗಿದೆ ಎಂದು ವರದಿಯಾಗಿದೆ. ವಿಶೇಷವಾಗಿ ಮುರೀದ್ಕೆಯಲ್ಲಿದ್ದ ಪ್ರಮುಖ ತರಬೇತಿ ಕೇಂದ್ರ ನಾಶವಾದ ಬಳಿಕ ಸಂಘಟನೆ ಮತ್ತು ಪಾಕಿಸ್ತಾನದ ಗುಪ್ತಚರ ಸಂಸ್ಥೆ Inter-Services Intelligence (ಐಎಸ್ಐ) ನಡುವೆ ಹಲವು ಸುತ್ತಿನ ಚರ್ಚೆಗಳು ನಡೆದಿವೆ ಎನ್ನಲಾಗಿದೆ.
ಆದರೆ ಈ ಸಭೆಗಳು ನಿರೀಕ್ಷಿತ ಫಲ ನೀಡದ ಹಿನ್ನೆಲೆಯಲ್ಲಿ ಈಗ ಪಾಕಿಸ್ತಾನದ ರಾಜಕೀಯ ವಲಯವೇ ನೇರವಾಗಿ ಮಧ್ಯಪ್ರವೇಶ ಮಾಡುತ್ತಿರುವ ಸೂಚನೆಗಳು ದೊರಕಿವೆ ಎಂದು ಭಾರತೀಯ ಭದ್ರತಾ ಸಂಸ್ಥೆಗಳು ಹೇಳಿವೆ.
ಇತ್ತೀಚೆಗೆ ಫೈಸಲಾಬಾದ್ನಲ್ಲಿ ಲಷ್ಕರ್ ಸಂಸ್ಥಾಪಕ ಹಫೀಜ್ ಸಯೀದ್ ಪುತ್ರ ತಲ್ಹಾ ಸಯೀದ್ ಮತ್ತು ಪಾಕಿಸ್ತಾನ ಪ್ರಧಾನಿ ಶೆಹಬಾಜ್ ಷರೀಫ್ ಅವರ ಆಪ್ತ ಸಹಾಯಕ ರಾಣಾ ಸನಾವುಲ್ಲಾ ನಡುವಿನ ಸಭೆ ಗಮನ ಸೆಳೆದಿದೆ.
ಈ ಸಭೆಯ ಬಳಿಕ ಇಸ್ಲಾಮಾಬಾದ್ನಲ್ಲಿ ರಾಣಾ ಸನಾವುಲ್ಲಾ ಮತ್ತು ಶೆಹಬಾಜ್ ಶರೀಫ್ ನಡುವೆ ಮತ್ತೊಂದು ಸಭೆ ನಡೆದಿದ್ದು, ಇದು ಕೇವಲ ಸೌಜನ್ಯ ಭೇಟಿಯಲ್ಲ ಎಂದು ಭಾರತೀಯ ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಪಾಕಿಸ್ತಾನ ಆಡಳಿತ ವಲಯವು ಲಷ್ಕರ್ ಸಂಘಟನೆಗೆ ಹೊಸ ನಾಯಕತ್ವವನ್ನು ಅಧಿಕೃತವಾಗಿ ಘೋಷಿಸಲು ಯೋಚಿಸುತ್ತಿದೆ ಎನ್ನಲಾಗಿದೆ. ವಯೋವೃದ್ಧ ಹಫೀಜ್ ಸಯೀದ್ ಅವರನ್ನು ಸೈದ್ಧಾಂತಿಕ ಮಾರ್ಗದರ್ಶಕರಾಗಿ ಉಳಿಸಿ, ತಲ್ಹಾ ಸಯೀದ್ ಅವರನ್ನು ಕಾರ್ಯಾಚರಣೆಯ ಮುಖ್ಯಸ್ಥರಾಗಿ ಘೋಷಿಸುವ ಚರ್ಚೆ ನಡೆದಿದೆ ಎಂದು ಮೂಲಗಳು ತಿಳಿಸಿವೆ.
75 ವರ್ಷದ ಹಫೀಜ್ ಸಯೀದ್ ಸಂಘಟನೆಯನ್ನು ಮುನ್ನಡೆಸಲು ಅಸಮರ್ಥರಾಗಿದ್ದಾರೆ ಎಂಬ ಅಭಿಪ್ರಾಯ ಸಂಘಟನೆಯೊಳಗೂ ಮೂಡಿದ್ದು, 50 ವರ್ಷದ ತಲ್ಹಾ ಹೊಸ ತಂತ್ರಜ್ಞಾನ ಅರಿವು ಮತ್ತು ಕಾರ್ಯಕರ್ತರೊಂದಿಗೆ ಉತ್ತಮ ಸಂಪರ್ಕ ಹೊಂದಿರುವುದರಿಂದ ಅವರನ್ನು ನಾಯಕತ್ವಕ್ಕೆ ತರುವ ಯತ್ನ ನಡೆಯುತ್ತಿದೆ ಎನ್ನಲಾಗಿದೆ.
ಇನ್ನೊಂದೆಡೆ, ಪಾಕಿಸ್ತಾನಕ್ಕೆ ಬಲೂಚಿಸ್ತಾನ ಮತ್ತು ಖೈಬರ್ ಪಖ್ತೂನ್ಖ್ವಾ ಪ್ರದೇಶಗಳ ಭದ್ರತಾ ಸಮಸ್ಯೆಗಳು ದೊಡ್ಡ ತಲೆನೋವಾಗಿ ಪರಿಣಮಿಸಿವೆ. ವಿಶೇಷವಾಗಿ ಬಲೂಚಿಸ್ತಾನ್ ಲಿಬರೇಶನ್ ಆರ್ಮಿ (ಬಿಎಲ್ಎ) ದಾಳಿಗಳಿಂದ ಪಾಕಿಸ್ತಾನ ಸೇನೆಗೆ ಭಾರೀ ನಷ್ಟ ಉಂಟಾಗಿದೆ.
ಈ ಹಿನ್ನೆಲೆಯಲ್ಲಿ ಬಿಎಲ್ಎ ಜೊತೆ ಶಾಂತಿ ಮಾತುಕತೆ ನಡೆಸಲು ತಲ್ಹಾ ಸಯೀದ್ ನೇತೃತ್ವದ ತಂಡವನ್ನು ಬಳಕೆ ಮಾಡುವ ಯೋಚನೆ ಪಾಕಿಸ್ತಾನ ಆಡಳಿತದೊಳಗೆ ಚರ್ಚೆಯಾಗುತ್ತಿದೆ ಎಂದು ವರದಿ ಹೇಳಿದೆ.
ಬಲೂಚಿಸ್ತಾನದಲ್ಲಿ ನಡೆಯುತ್ತಿರುವ ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (ಸಿಪಿಇಸಿ) ಯೋಜನೆಗಳ ಸುರಕ್ಷತೆ ಪಾಕಿಸ್ತಾನಕ್ಕೆ ಅತ್ಯಂತ ಮಹತ್ವದ ವಿಷಯವಾಗಿದೆ. ಸಿಪಿಇಸಿ ಎರಡನೇ ಹಂತ ಆರಂಭವಾಗಲಿರುವ ಹಿನ್ನೆಲೆಯಲ್ಲಿ ಬಲೂಚ್ ಜನರ ಬೆಂಬಲ ಪಡೆಯಲು ಇಸ್ಲಾಮಾಬಾದ್ ಪ್ರಯತ್ನಿಸುತ್ತಿದೆ ಎನ್ನಲಾಗಿದೆ.
ಅದೇ ರೀತಿ ಅಮೆರಿಕ ಕೂಡ ಬಲೂಚಿಸ್ತಾನದ ರೆಕೊ ಡಿಕ್ ಚಿನ್ನ ಮತ್ತು ತಾಮ್ರ ಗಣಿಗಾರಿಕೆ ಯೋಜನೆಗೆ 1.3 ಬಿಲಿಯನ್ ಡಾಲರ್ ಹೂಡಿಕೆ ಘೋಷಿಸಿರುವ ಹಿನ್ನೆಲೆಯಲ್ಲಿ ಭದ್ರತಾ ಆತಂಕಗಳು ಹೆಚ್ಚಿವೆ.
ಭಾರತೀಯ ಗುಪ್ತಚರ ಮೂಲಗಳ ಪ್ರಕಾರ, ಬಿಎಲ್ಎ ಪಾಕಿಸ್ತಾನ ಆಡಳಿತ ವ್ಯವಸ್ಥೆಯವರೊಂದಿಗೆ ನೇರವಾಗಿ ಮಾತುಕತೆ ನಡೆಸುವ ಸಾಧ್ಯತೆ ಕಡಿಮೆ. ಆದ್ದರಿಂದ ಲಷ್ಕರ್ ನಾಯಕರ ಮೂಲಕ ಮಧ್ಯಸ್ಥಿಕೆ ಸಾಧಿಸಲು ಪಾಕಿಸ್ತಾನ ಯತ್ನಿಸುತ್ತಿದೆ ಎನ್ನಲಾಗಿದೆ.
ಮುಂದಿನ ದಿನಗಳಲ್ಲಿ ಲಷ್ಕರ್ ನಾಯಕರು ಮತ್ತು ಪಾಕಿಸ್ತಾನದ ರಾಜಕೀಯ ನಾಯಕತ್ವದ ನಡುವೆ ಇನ್ನಷ್ಟು ಸಭೆಗಳು ನಡೆಯುವ ಸಾಧ್ಯತೆ ಇದೆ ಎಂದು ಮೂಲಗಳು ಸೂಚಿಸಿವೆ.
