ನವದೆಹಲಿ: ಒಮಾನ್ನ ಮಸ್ಕಟ್ನಲ್ಲಿ ಜುಲೈ 20ರಿಂದ 25ರವರೆಗೆ ನಡೆಯಲಿರುವ ಮೊದಲ ಯೂತ್ ಹಾಕಿ5ಸ್ ಏಷ್ಯನ್ ಚಾಂಪಿಯನ್ಶಿಪ್-2026ಗಾಗಿ ಭಾರತ ಹಾಕಿ ಸಂಸ್ಥೆ (Hockey India) ಮಂಗಳವಾರ ಭಾರತ ಸಬ್-ಜೂನಿಯರ್ ಪುರುಷ ಮತ್ತು ಮಹಿಳಾ ತಂಡಗಳನ್ನು ಪ್ರಕಟಿಸಿದೆ. ಈ ಖಂಡಮಟ್ಟದ ಟೂರ್ನಿಯು ಮೊದಲ ಬಾರಿಗೆ ನಡೆಯಲಿರುವ ಎಫ್ಐಎಚ್ ಅಂಡರ್-18 ಯೂತ್ ಹಾಕಿ5ಸ್ ವಿಶ್ವಕಪ್ಗೆ ಏಷ್ಯಾದ ಅರ್ಹತಾ ಟೂರ್ನಿಯಾಗಿಯೂ ಕಾರ್ಯನಿರ್ವಹಿಸಲಿದೆ.
ಪುರುಷರ ವಿಭಾಗದಲ್ಲಿ ಆತಿಥೇಯ ಒಮಾನ್, ಭಾರತ, ಪಾಕಿಸ್ತಾನ, ಇರಾನ್, ಇರಾಕ್, ಸೌದಿ ಅರೇಬಿಯಾ ಹಾಗೂ ಬಾಂಗ್ಲಾದೇಶ ತಂಡಗಳು ಸ್ಪರ್ಧಿಸಲಿವೆ. ಮಹಿಳಾ ವಿಭಾಗದಲ್ಲಿ ಭಾರತ, ಪಾಕಿಸ್ತಾನ, ಒಮಾನ್, ಚೀನಾ, ಉಜ್ಬೇಕಿಸ್ತಾನ್, ಕಜಕಸ್ತಾನ್ ಹಾಗೂ ಇರಾನ್ ತಂಡಗಳು ಕಣಕ್ಕಿಳಿಯಲಿವೆ.
ಭಾರತೀಯ ತಂಡಗಳನ್ನು ಚಂಡೀಗಢದಲ್ಲಿ ನಡೆಯುತ್ತಿರುವ 15 ಸದಸ್ಯರ ಪುರುಷರ ರಾಷ್ಟ್ರೀಯ ಶಿಬಿರ ಹಾಗೂ ಭೋಪಾಲ್ನಲ್ಲಿ ನಡೆಯುತ್ತಿರುವ 15 ಸದಸ್ಯರ ಮಹಿಳಾ ರಾಷ್ಟ್ರೀಯ ಶಿಬಿರದಿಂದ ಆಯ್ಕೆ ಮಾಡಲಾಗಿದೆ.
ಸಬ್-ಜೂನಿಯರ್ ಮಹಿಳಾ ತಂಡವನ್ನು ಸ್ವೀಟಿ ಕುಜೂರ್ ಮುನ್ನಡೆಸಲಿದ್ದಾರೆ. ತಂಡದಲ್ಲಿ ಗೋಲ್ಕೀಪರ್ಗಳಾಗಿ ಖಿಲಿ ಕುಮಾರಿ ಹಾಗೂ ಮಹಕ್ ಪರಿಹಾರ್ ಸ್ಥಾನ ಪಡೆದಿದ್ದಾರೆ. ರಕ್ಷಣಾ ವಿಭಾಗದಲ್ಲಿ ನೀಲಂ ಟೊಪ್ನೋ ಮತ್ತು ಕಿರಣ್ ಎಕ್ಕಾ ಇದ್ದಾರೆ. ಮಿಡ್ಫೀಲ್ಡ್ನಲ್ಲಿ ದಿಯಾ, ಪುಷ್ಪಾ ಮಂಜಿ ಹಾಗೂ ಶ್ರುತಿ ಕುಮಾರಿ ಆಡಲಿದ್ದಾರೆ. ಫಾರ್ವರ್ಡ್ ವಿಭಾಗದಲ್ಲಿ ನೌಶೀನ್ ನಾಜ್, ಸಂದೀಪಾ ಕುಮಾರಿ ಹಾಗೂ ನಾಯಕಿ ಸ್ವೀಟಿ ಕುಜೂರ್ ಸ್ಥಾನ ಪಡೆದಿದ್ದಾರೆ.
ತಂಡದ ಆಯ್ಕೆ ಕುರಿತು ಪ್ರತಿಕ್ರಿಯಿಸಿದ ಮಹಿಳಾ ತಂಡದ ಕೋಚ್ ರಾಣಿ, “ನಾವು ಕೌಶಲ್ಯ, ವೇಗ ಮತ್ತು ಉತ್ತಮ ವ್ಯಕ್ತಿತ್ವ ಹೊಂದಿದ ಸಮತೋಲಿತ ತಂಡವನ್ನು ಆಯ್ಕೆ ಮಾಡಿದ್ದೇವೆ. ಆಟಗಾರ್ತಿಯರು ತರಬೇತಿ ಶಿಬಿರದಲ್ಲಿ ಅತ್ಯಂತ ಶ್ರಮವಹಿಸಿ ತಮ್ಮ ಆಟವನ್ನು ಪ್ರತಿಯೊಂದು ಕ್ಷೇತ್ರದಲ್ಲೂ ಸುಧಾರಿಸಲು ಬದ್ಧತೆಯಿಂದ ಕೆಲಸ ಮಾಡಿದ್ದಾರೆ.
ಹಾಕಿ5ಸ್ ಅತ್ಯಂತ ವೇಗದ ಮಾದರಿಯಾಗಿದ್ದು, ಕ್ಷಿಪ್ರ ನಿರ್ಧಾರ, ಹೊಂದಾಣಿಕೆ ಮತ್ತು ಹೆಚ್ಚಿನ ಶಕ್ತಿಯ ಅಗತ್ಯವಿದೆ. ನಮ್ಮ ತರಬೇತಿಯಲ್ಲಿ ಈ ಅಂಶಗಳಿಗೆ ವಿಶೇಷ ಒತ್ತು ನೀಡಿದ್ದೇವೆ. ಈ ಟೂರ್ನಿ ನಮ್ಮ ಯುವ ಆಟಗಾರ್ತಿಯರಿಗೆ ಏಷ್ಯಾದ ಶ್ರೇಷ್ಠ ತಂಡಗಳ ವಿರುದ್ಧ ತಮ್ಮ ಸಾಮರ್ಥ್ಯ ಪ್ರದರ್ಶಿಸಲು ಉತ್ತಮ ವೇದಿಕೆಯಾಗಲಿದೆ. ಅವರು ನಿರ್ಭೀತಿಯಿಂದ ಆಡುತ್ತಾ ಭಾರತದ ಗೌರವ ಹೆಚ್ಚಿಸಲಿದ್ದಾರೆ ಎಂಬ ವಿಶ್ವಾಸವಿದೆ,” ಎಂದು ಹೇಳಿದರು.
ಸಬ್-ಜೂನಿಯರ್ ಪುರುಷರ ತಂಡಕ್ಕೆ ಕೇತನ ಕುಶ್ವಾಹ ನಾಯಕರಾಗಿದ್ದಾರೆ. ತಂಡದಲ್ಲಿ ಗೋಲ್ಕೀಪರ್ಗಳಾಗಿ ಸಾವನ್ ಕುಮಾರ್ ಹಾಗೂ ಆಯುಷ್ ರಾಜಕ್ ಇದ್ದಾರೆ. ರಕ್ಷಣಾ ವಿಭಾಗದಲ್ಲಿ ಕರಣ್ ಗೌತಮ್ ಹಾಗೂ ಆಶೀಷ್ ತಾನಿ ಪುರ್ತಿ ಸ್ಥಾನ ಪಡೆದಿದ್ದಾರೆ. ಮಿಡ್ಫೀಲ್ಡ್ನಲ್ಲಿ ರಾಹುಲ್ ಯಾದವ್ ಹಾಗೂ ರೋಮಿತ್ ಪಾಲ್ ಇದ್ದರೆ, ಫಾರ್ವರ್ಡ್ ವಿಭಾಗದಲ್ಲಿ ಕೇತನ ಕುಶ್ವಾಹ, ಪ್ರಹ್ಲಾದ್ ರಾಜ್ಭರ್, ಅರ್ಷ್ದೀಪ್ ಸಿಂಗ್ ಹಾಗೂ ಶಾರುಖ್ ಅಲಿ ಸ್ಥಾನ ಪಡೆದಿದ್ದಾರೆ.
ಪುರುಷರ ತಂಡದ ಕೋಚ್ ಸರ್ದಾರ್ ಸಿಂಗ್ ಮಾತನಾಡಿ, “ತರಬೇತಿ ಶಿಬಿರದಲ್ಲಿ ಸ್ಥಿರ ಪ್ರದರ್ಶನ ಮತ್ತು ಉತ್ತಮ ಶಿಸ್ತು ತೋರಿದ ಆಟಗಾರರು ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ. ಹಾಕಿ5ಸ್ ವೇಗ, ಸೃಜನಶೀಲತೆ ಹಾಗೂ ಒತ್ತಡದ ಸಂದರ್ಭದಲ್ಲೂ ಸಮತೋಲನ ಕಾಪಾಡುವ ಸಾಮರ್ಥ್ಯವನ್ನು ಬೇಡುವ ಮಾದರಿಯಾಗಿದೆ. ಆಟಗಾರರು ಈ ಮಾದರಿಗೆ ಉತ್ತಮವಾಗಿ ಹೊಂದಿಕೊಂಡಿದ್ದಾರೆ.
ಆಕ್ರಮಣಕಾರಿ ಶೈಲಿಯ ಹಾಕಿ ಆಡಲು ಸಮರ್ಥ ತಂಡವನ್ನು ರೂಪಿಸುವುದಕ್ಕೆ ನಾವು ಒತ್ತು ನೀಡಿದ್ದೇವೆ. ಈ ಟೂರ್ನಿ ಯುವ ಆಟಗಾರರಿಗೆ ಅಂತಾರಾಷ್ಟ್ರೀಯ ಅನುಭವ ಪಡೆಯಲು ಮತ್ತು ತಮ್ಮ ಪ್ರತಿಭೆಯನ್ನು ತೋರಿಸಲು ಉತ್ತಮ ಅವಕಾಶವಾಗಿದೆ. ಭಾರತಕ್ಕೆ ಹೆಮ್ಮೆ ತರುವ ಪ್ರದರ್ಶನ ನೀಡುವ ವಿಶ್ವಾಸವಿದೆ,” ಎಂದು ಹೇಳಿದರು.
ಮೊದಲ ಎಫ್ಐಎಚ್ ಅಂಡರ್-18 ಯೂತ್ ಹಾಕಿ5ಸ್ ವಿಶ್ವಕಪ್ಗೆ ಅರ್ಹತೆ ಪಡೆಯುವ ಗುರಿಯೊಂದಿಗೆ ಭಾರತ ತಂಡ ಈ ಚಾಂಪಿಯನ್ಶಿಪ್ನಲ್ಲಿ ಬಲಿಷ್ಠ ಆರಂಭ ಮಾಡುವ ಉದ್ದೇಶ ಹೊಂದಿದ್ದು, ವಯೋಮಿತಿಯ ಹಾಕಿಯಲ್ಲಿ ಭಾರತದ ಯಶಸ್ಸಿನ ಪರಂಪರೆಯನ್ನು ಮುಂದುವರಿಸಲು ಸಜ್ಜಾಗಿದೆ.
ಭಾರತ ತಂಡಗಳು ಸಬ್-ಜೂನಿಯರ್ ಮಹಿಳಾ ತಂಡ:
ಗೋಲ್ಕೀಪರ್ಗಳು: ಖಿಲಿ ಕುಮಾರಿ, ಮಹಕ್ ಪರಿಹಾರ್ ರಕ್ಷಣಾ ಆಟಗಾರ್ತಿಯರು: ನೀಲಂ ಟೊಪ್ನೋ, ಕಿರಣ್ ಎಕ್ಕಾ ಮಿಡ್ಫೀಲ್ಡರ್ಗಳು: ದಿಯಾ, ಪುಷ್ಪಾ ಮಂಜಿ, ಶ್ರುತಿ ಕುಮಾರಿ ಫಾರ್ವರ್ಡ್ಗಳು: ನೌಶೀನ್ ನಾಜ್, ಸಂದೀಪಾ ಕುಮಾರಿ, ಸ್ವೀಟಿ ಕುಜೂರ್ (ನಾಯಕಿ)
ಸಬ್-ಜೂನಿಯರ್ ಪುರುಷರ ತಂಡ ಗೋಲ್ಕೀಪರ್ಗಳು: ಸಾವನ್ ಕುಮಾರ್, ಆಯುಷ್ ರಾಜಕ್ ರಕ್ಷಣಾ ಆಟಗಾರರು: ಕರಣ್ ಗೌತಮ್, ಆಶೀಷ್ ತಾನಿ ಪುರ್ತಿ ಮಿಡ್ಫೀಲ್ಡರ್ಗಳು: ರಾಹುಲ್ ಯಾದವ್, ರೋಮಿತ್ ಪಾಲ್ ಫಾರ್ವರ್ಡ್ಗಳು: ಕೇತನ ಕುಶ್ವಾಹ (ನಾಯಕ), ಪ್ರಹ್ಲಾದ್ ರಾಜ್ಭರ್, ಅರ್ಷ್ದೀಪ್ ಸಿಂಗ್, ಶಾರುಖ್ ಅಲಿ.
