ಬೆಂಗಳೂರು: ನಟ ಡಾಲಿ ಧನಂಜಯ್ ಬಿರಿಯಾನಿ ತಿನ್ನುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಜಾತಿ–ಸಮುದಾಯದ ಚರ್ಚೆಗೆ ಕಾರಣವಾದ ಹಿನ್ನೆಲೆಯಲ್ಲಿ, ಈ ವಿಚಾರಕ್ಕೆ ಸಂಬಂಧಿಸಿದ ಟೀಕೆಗಳಿಗೆ ಅವರು ತೀವ್ರ ಪ್ರತಿಕ್ರಿಯೆ ನೀಡಿದ್ದಾರೆ.
ಸ್ನೇಹಿತನ ಹೋಟೆಲ್ ಉದ್ಘಾಟನೆ ವೇಳೆ ಬಿರಿಯಾನಿ ಸೇವಿಸಿದ್ದನ್ನು ಲಿಂಗಾಯತ ಸಮುದಾಯದೊಂದಿಗೆ ತಳುಕು ಹಾಕಿ ಪ್ರಶ್ನಿಸಿರುವುದು ಬೇಸರ ತಂದಿದೆ ಎಂದು ಧನಂಜಯ್ ಹೇಳಿದ್ದಾರೆ. “ನಾನು ಏನು ತಿನ್ನುತ್ತೇನೆ ಅನ್ನೋದು ನನ್ನ ವೈಯಕ್ತಿಕ ವಿಚಾರ. ಧನಂಜಯ್ ನಾನ್ವೆಜ್ ತಿಂತಾರಾ ಎಂದು ಕೇಳೋದು ತಪ್ಪಲ್ಲ. ಆದರೆ ಲಿಂಗಾಯತರು, ಬ್ರಾಹ್ಮಣರೆಲ್ಲರೂ ಮಾಂಸ ತಿಂತಾರಾ ಎಂದು ಸಮುದಾಯವನ್ನೇ ಎಳೆದು ತರುವುದು ತಪ್ಪು” ಎಂದು ಸ್ಪಷ್ಟಪಡಿಸಿದ್ದಾರೆ.
ಚಿತ್ರರಂಗದಲ್ಲಿ ತಾವು ಮಾಡುತ್ತಿರುವ ಕೆಲಸದ ಬಗ್ಗೆ ಚರ್ಚೆಯಾಗಬೇಕು, ವೈಯಕ್ತಿಕ ಆಹಾರ ಪದ್ಧತಿಯನ್ನು ಜಾತಿ–ಸಮುದಾಯದ ವಿಷಯವನ್ನಾಗಿ ಮಾಡುವುದು ಸರಿಯಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. “ಯಾವುದೇ ಅಭ್ಯಾಸ ಇತಿಮಿತಿಯಲ್ಲಿರಬೇಕು. ನನ್ನ ಆಹಾರದ ಆಯ್ಕೆಯಿಂದ ಬೇರೆ ಯಾರಿಗೂ ತೊಂದರೆಯಾಗದಿದ್ದರೆ ಅದು ತಪ್ಪಲ್ಲ” ಎಂದು ಡಾಲಿ ಧನಂಜಯ್ ಹೇಳಿದರು.
